Prins Remco I (2023)

– Erfprins vaan de Redemptielaon in Wolder
– Graof vaan de Saturnushof in Daalhof
– Oppercommandeur vaan de èllentrikzake vaan Enexis
– Ierste Oonder tamboer-maitre vaan ‘t Blouwe Tamboerkorps
– Spesjaol slaagmeister vaan zate hermenie Vreug en Neugter
– Iere kieper vaan Leonidas, half Mestreech-Wes en half Belsj-oos
– Iereveurzitter vaan Motorclub SaturnDaalhof

Gebore bin iech 4×11 jaor geleie oonder aon de Redemptielaon. Mien ierste sjaoldiploma kraog iech bij Pie en Pow. Via de middelbaar sjaol vaan ’t Treechter, de MTS en de HTS in Heerle bin iech oeteindelek terèch gekaome bij Enexis. Daor daon iech gèt ‘spannends’, ech net wèrke!

Umtot de buurjong bei de Blouwe ging, ging iech ouch. Mèt 8 jaor kreeg iech al blokfluitles, mèr iech voont ‘t sjieker um d’r mèt te howwe. Via ’t jäögorkès bin iech bei de drumband terech gekaome. Ouch mien breurke Guy en pap vaan miech höbbe veer ne tied tot de Blouwe mage rekene. Oondertösse bin iech al zoen 35 jaor ‘ne echte Blouwe!

Iech haw vaan de Vastelaovend en vaan Wolder. Iech bin al ieder lid gewees vaan de Raod vaan Elf vaan CV De Blouwe, mèr iech bin al hiel lang met de Vastelaovend oonderweeg in Mestreech in het roed-geel-greun vaan Vreug en Neugter.

Mien prinses Cindy en euze zoon Stef goon daor daan ouch gere mèt. Veer woene mèt eus dreie in ’t prinselek pelies op de Saturnushof in Daalhof.

Es vastelaovendsvierder oet Wolder vin iech ’t daan ouch sjiek um zjubileiprins te zien vaan CV De Blouwe, die noe alweer 6×11 +1 jaor besteit.

Heibij belaof iech uuch bij de grasie vaan De Blouwe um ‘ne gruutse prins te zien.

Iech belaof wijer tot:

  • iech mien Cindy zal verwene es ’n echte prinses;
  • iech miene zoon Stef mèt zal numme in de Vastelaovendspripperatie;
  • iech vaanaof noe mien spannend wèrk neerlegk en miech gaon oont-spanne;
  • iech miene elektrische oto zal laote stoon veur de prinseleke taxi;
  • iech de Raod vaan Elf zal veurgoon bij ‘t oetdrinke vaan alle pöt beer, of aander alcoholisch of non-alcoholisch voch;
  • iech alle Woldernere en neet Woldernere zal veurgoon in dees Wolderse vastelaovend, al kos miech dat miene allerlèste dröppel Blouw blood

Sjöt in, Sjöt in, Sjöt in!

Veurgeleze op 28 jannewarie in ‘t jaor 2023
In de Blouwe Hoftempel vaan ‘t dörp Wolder
In de groete stad Mestreech